Vincent van Gogh

Ing larawan a pinintura nang Van Gogh king kayang sarili

I Vincent Willem van Gogh (30 Marzu 1853 – 29 Juliu 1890) metung yang talapinta o pintor a Holandes (Dutch) king estilung Post-Impressionist. Kayabe la kareng pikabaluan dili, pekasikat ampong mal dili king yatu deng kayang pinintura ampong ginulis.

Aniang bayu-bayu ya pang miras king edad i Van Gogh, megobra ya para king metung a cumpania da reng mamisaling bageng maki kaugnayan king kalalangan o art. E ya migumpisa king karera na antimong talalalang o artist manibat kanitang 1880. Aniang mumuna, deta pamung maralumdum (sombre) a kule ing kayang gagamitan, anggang atupan na ing Impressionism ampo ing Neo-Impressionism king Paris. Inabe na ing masiglang kule ampong paralan ning pamamintura king estilung iti ketang kayang sariling pamamintura, anggang mika sarili yang estilu nung nu ya mekilala. Ganap yang mealkus (fully developed) ing estilung iti aniang menuknangan ya king Arles, Francia. Maigit lang aduang libu (2,000) deng kayang obra, kayabe no reng siam a ralan (900) a pinintura ampong libu dinalan (1,100) a ginulis (drawings and sketches), aniang tauling apulung banua ning kayang bie. Melalang la reng pikabaluan nang diling obra aniang tauling aduang banua ning kayang bie, nung kapilan pinutut ne ing metung a dake ning kayang kailing balugbug kaibat nang mesira ning kayang pamikaluguran kang Paul Gauguin. Kaibat na niti, susumpungan ne ning sakit king pamanisip, a yang sangkan ning kayang pamagpakamate.

Aliwang website (karinan king Aptas)

• Van Gogh Gallery
• Van Gogh Museum Amsterdam
• The Complete Works of Vincent van Gogh

[1]