RocKapampangan

Ibat king Wikipedia

Ing RocKapampangan: The Birth of Philippine Kapampangan Rock ing mumunang diling Kapampangan rock album king kasalesayan. Ing katayang RocKapampangan kinudta neng Jason Paul Laxamana, miki idad a 20, at melalang ya ing album kapamilatan ning saup na ning Juan D. Nepomuceno Center for Kapampangan Studies at ding bandang makayabe. Me-record la ring kanta king D'Zone Digital Recording Studio at pepalual do ring CD inyang Pebreru 18, 5 n.g. king Plaza San Jose, Holy Angel University.

Panagimpan da ring makidapat king RocKapampangan ing itanam karing bayung sisibul a Kapampangan a talatigtig ing lugud king karelang balen at amanung Kapampangan, na ipagmaragul da ing karelang dayi angga king musika at pamaglalang dalit. Kapagnasan da mu rin ding makidapat ing manambag king pamagpasaplala king musikang Kapampangan king kapamilatan ning pamanggawang bayung dalit Kapampangan a makayamanu king Kapampangan gamit ding anyu ning musikang kapad da ring makabayung kayanakan.



Labing anam lang banda ring tinipun da ring mamuntukan bang gawang tunggalan a Kapampangan a kanta. Keraklan karing banda mig-revive lang sikat a pulosa, basultu, dalit ukbu, at matuang kanta kabang atlu naman karela ing sinulat talaga karing karelang ambag para king album. Ding bandang makayabe king album ila pin ding Asthma (Atin Ku Pung Singsing 2), Fine Time (40 Aldo), Nora Aunor Fans Club (Kaplas), Pulse Rhythm (Saug A Malati), Silence (Indung Balayan), Mernuts (Aliwa Kang Talaga), Amygdala (Aldo Ning Kekeng Kasal), Cyclo (Dalumdum Ning Bengi), T.H.E.M. (Kasamsaman), Neophytes (Katatagan King Pamakilaban), Mental Floss (Ing Lugud Ning Indu), Dialogo (Atsing Rosing), Chilimansi (Istorya Nang Raffy Balboa), Tibuan (Sintang Pangarap), Fourth Clan (Dayang Kapampangan) ampong 5 Against the Wall (Sibul Na Ning Arayat).

Metampuk ne ing RocKapampangan karing miyayaliwang palage king TV at radyu: Kapuso Mo, Jessica Soho (GMA-7), Pampanga (ABS-CBN Pampanga), Personalan (Infomax), Viva Pampanga (GVAM 792), TV Patrol Pampanga (ABS-CBN Pampanga), I-Max News (Infomax); at karing miyayaliwang dyaryu: Philippine Daily Inquirer, Sun Star Pampanga, at Punto.


Ding suglung a palual[mag-edit | alilan ya ing pikuwanan]

[1] "Going RocKapampangan" nang Tonette Orejas, Philippine Daily Inquirer

[2][suglung a mepatad] "Rock and Kapampangan" nang Robby Tantingco, Sun Star Pampanga

[3][suglung a mepatad] "Busang Basultu: Dinatang Na Mu Rin!" nang Kragi Garcia, Sun Star Pampanga

[4] "Launching of RocKapampangan Album, a Success" nang Jason Paul Laxamana, The Prodigal Kamaru Blog

[5] "RocKapampangan" nang Joel Mallari, Punto / Tarebalak Discovery

[6] Pampanga (ABS-CBN Pampanga)