Basultu Babo ning Damulag

Ibat king Wikipedia
Jump to navigation Jump to search

Kalgaretang Kambing Neng Renato B. Alzadon

Paka-gareta la ding sugu nang Bertu Manakut lang pale bubuntun king Patyu; Ngana nining Biling a anak nang Saryu Atin sang pulutan at saka Aneju.

Oras ning paugtuan, sinungab neng tambing kabang lalangut ya maglabit ya'y Biling; Maski nanu klasing pulutan malasing apangan ku, ngana, puera mu keng kambing.

Yang kambing, nan de mang samasan ilutu Ali ke apangan atmu ne ka-anggu; Belikdan ne kanian ning matuang miglutu Bileng, nanu ya yang kakanan mu, itu?

Ding Pindang Neng Renato B. Alzadon

Mag-malaguintu na ing kadua tang bili Pamamalakayang disan na ning pali; Dening dinatang a dagis ning Mauli Gagawan dang sale tanke rang pemakli.

Ngarang manula ding bisita king Baryu Manalik tang kuldun dumanup ta kanu; uling alang salang emu mamagkanu ing siran dang pale salut a perwisyu..

Dening mapanula kanian no mag-mintis Era kata balu galing at kilatis; Subali king dakal ta abias at mais Nananu na la mu dening pindang --------


Bigsu Na Mu Neng Renato B. Alzadon

Ing Konsejal Iru meangu ing bie na Atyu makaburul king mismung bale na; Dakal la ding taung babie galang kaya Balang miapagan maglutu lang baka.

Ing baka, e paman melambut a laman Y Tikung Gilagid maniawad neng kanan; Linapas yang ditak ketang palambutan Saka ne inakmul mebaknal ya kanian.

Penimid de atyan masuerti nyang tutu Linual ya ing karning inakmul nang Tiku; Kamasmas na, ngana, nu ko bigsu na mu--- Bigsu na ku pala tinuki kang Iru.