Ing Vendeta ning Poeta neng Renato V. Alzadon

Ibat king Wikipedia
Jump to navigation Jump to search

Kaluguran kung Poeta , akuman, paniwalan mu

Enaku sana bisa pang mamikudtang pasibayu;

Dapot kening akakit kung kapagpabustan ning tau

King tungkul nang ingatan ne ing mulajan na ning Guinu;

Kening kalapastanganan king kapaligiran tamu---

King Indung Naturalesang palsintan mu---palsintan ku;

Telanan ke ining lira! O Poeta ning balen ku,

Talanan me sa ing keka, ban ing api maglipatu!


Palsintan teng madalise ing Indung Naturalesa

Pablasang yang babie tindag king diwa na ning Poeta;

Itang angin a saguiwang inawa ning Paralaya

Ing lagusgus da ding batis, ing banglu ra ding sampaga;

Ing tumaila ra ding ayup a maniale karing sanga

Ding tungatung da ding bunduk at mawalak a sabana;

Poeta, palsintan ta yan---at ya ngening sisiran da!

Dapat mung igale tala ding mamaping poesia.


Sasabian ding kayanakan, ena kanu usu ngeni

Ing pamigale poesia linuma ning Karaoki;

Inia naman ngeni oyan, ding bague kawili-wili

A palsintan ning Poeta matatda king yatung iti;

Nukarin la ding batisan a pagsarian tang parati

Nung nu tala panintunan detang Nimpang masasabi?

Bakit ding malino batis memala la at kinati---?

Kalupa na ning Poesiang sikwil da ding bayung suli.


Nukarin ya, O Poeta, ing malilung a kapuluan

Nung nu ding myaliwang ayup Paraiso deng pagkarinan?

kabang talu mamag-koplas king babo ra ding tanaman

Babagayan tang poesia ing malambis dang kundiman;

Ngeni, lon mu, kinutud do detang dutung king mulajan

Tinabi da la ding ayup a lesakan da tuknangan;

Ing gabun a melitungtung memanabtak king kapalian

At king katulid nang banua manyawad yang katalaruan.


Pagmasdan me, O Poeta, ing mawalak a marangle

Kanita, ustung papalut, magmalaguintu ya kule;

Inia ding kawatasan ta magyuyu lang magpatawe

Kambe ra ding makabitin a tinalague ning pale;

Dapot ngeni, ing palayan, mamayuspus king katamle

Liliwan na itang danum, kukusad pakakalale;

Makanano, itang sibul, kalalaman dinulung ne

Uling meko ing salilung ding dutung a mengamate.


Pagmasdan me, O Poeta, ing pipandiluan a ilug

King tela-bubug nang danum masaya tang mipaniabug;

Inia ding kawatasan ta tikmus la pangalindayug

Karing alun a makialung karing bulang lunto- lumbug;

Dapot ngeni ninung bisang magtampiso ken at talbug

King danum nang makilarung menuling na king kalabug;

Ding susu, bya, asan, paro, mimin lang mete at limbug

Mengamate la king lasun a sasarian dang tutugtug.


Pagmasdan me ,O Poeta, ing baryu tang Aranguren

Pagmaragul te kanita anting kapisi ning Eden;

Itang pasu ding kabayung pamasada da king balen

Maki agpang king sukad na ning poesia tang babaslen;

Ing makanian a musikang paninapan nang Bethooven

Inakmul ning alingongo ra ding babasuk a saken;

Ing asuk at alingongo nung era agyung salesen

Sakit katawan at isip ing ausan dang datang ken.


Nukarin ya, O Poeta, itang angin na ning napun,

Itang angin a saguiwa neng mamunag a mamambun?

Atme niaman sasangapan neng lalague tang maranun

Pigale-gale taya pa king pastulan lele Tabun;

Ngeni itang angin aita, sumawa tanang manintun

Ene subli pang magbalik ban kekatamu magdatun;

At pablasang linasun ne ning panyulung ning panaun

Inia balang sangap tamu, sasangapan tamu lasun.


Nukarin ya, O Poeta, ing makabigjaning jardin

Neng manintun katang diwa karin kata mag-imain?

Nung nukarin la ding Rosas a palsintan da ding batwin

Katulan nong pakialungan ning malimadmad a angin,

Nukarin la detang Rosal, ding Gumamela, ding Jasmin,

Ding bonggabilyang malare karing balag bitin-bitin?

Ing leguan mitambunan ya, basura ing atyu karin,

Guewa ra nia mung ugsianan karing marinat dang lampin.


Pagmasdan me, O Poeta , itang bunduk king malaut

Ken to inapsi ding amlat para karing bayung sibut;

Ken to tikmus ding Mamana, ding usa at babing dikut

Ding Sudya at Encantada at Diwatang libut-libut;

Detang dutung nang matatag digsa dala at pemutut

King ditak a patalusad titipa dong pasalikut;

Ing gagawan dang makanian nung e tuknang at maputut

Magpaldas ya ing balayan king trajediang makatakut.


E makalingad, Poeta, king yang Bunduk ya ing tabing

A pader nang peka-sagka ning danuman a matabsing;

Nung matibag ya ing bunduk malaso ya ing Pun Patling

Lumbug ya ing Syudad Tarlak at ding baryung makasiping;

At kanita ne maramdam ing gulilsak a tatabling

Ing Sambitan at ing siguk, tagulele at saingsing!

Ing makipasari kanian ing dapat dang e masanting

Ding taung butang pamisip a maki pusung matuling.


Inia mekeni , Poeta, ding dalit tang maki-bagsik

Ila namang ilague ta balang maramdam laguitik;

Ing Poeta tin yang bersung mataram at maki-lisik

Anting kildap neng kaleldo, mitataung manalamsik;

Karening Pusung Matuling matindi teng ipandikdik

Ing Vendeta ning Poetang inamun dang pemalantik;

Ngening ing kekatang lira yang papaten da salpitik

Para king Naturalesa, dapat katang magjimagsik!