Kulumparit

Ibat king Wikipedia
Jump to navigation Jump to search

Kulumparit(Dikut a Malamarine) Neng: Renato B. Alzadon October 16,2005

Ibat king anak ku, kakilala kune Dikut-Kulumparit o Malamarine; Pikakasaman yang dikut king marangle Uling masuksuk ka kabud dilpakan me.

Inya makanian deng pamaligtad yamut Ampon sisilaban kaibat ning papalut; Talagang imbut da ding tau king Laut Ing patdan de lahi ing Marok a Dikut.

Inyang dagul nakung munta Amerika Ing Marok a Dikut ikit keng misan pa; Dapot ene dikut.....! Ing lawe da kaya Metung a tanaman.... malagung Sampaga!

Karin ya king siduan king Marmol nang Pasu Ninu man manakit pupurian de lagu; Pemalayawan deng "Malambut a Pusu" Kasi, tagkilan me, magtikum yang duku.

Ining Kulumparit o Malamarine Tin yang Guintung Aral king kekatamung bie; Ining kasaman dang sukal a metunggue Sampaga ya palang maulagang bague.

Eme pakalati yang taung kalulu Agyang Kulumparit ya mu king lawe mu; Pota nung akua yung mikit pasibayu Sampaga ya pala......Marangal yang tau!