Pamangawat

Ibat king Wikipedia
Lundag ka king: pamaglibut, paintunan

Neng: Renato B. Alzadon

Linampas king gulis ing sinta nang Benny
Buri neng kawatan ing dalagang Zenny;
Mikatagun naman mete ing kuryenti
Bala na, talagang dinatang ing suerti.

Keta kari Zenny, ining marok nasa
linub yang antimong mandaguis a pusa;
Kabud ikit ne ing manyinding kandila,
Kinangua yang tyempu-----kinaul neng bigla.


Kanian no man sunlag ding bombilyang sulu
Nung nanung milyari kanian na mabalu;
Ing kakaulan nang linapat king salu
Ing Apu nang Zenny-----ing matuang mebalu.


Oyan ing bunga ning aliguat ning laman
King taung mangawat king keralumduman;
O' inia pin pala babawu yang maman
Matua yang palmama ing kayang panuman.


King kulungan Baryu karin ya misulmuk
Benitu Labuyu a mengalbag asbuk;
Pablasang nabengi ding dalagang yamuk
Alire tiknangan panuman a pambuk.


At kabud kalual nang Benito Labuyu
King kekaming baryu aliwa ne lagyu;
Angga na king muti ne buak a gugupu
Dala ne ing lagyung Bening Kawat-Apu.

(2005-Poesia Rima-Perpecta)