Ángela Manalang Gloria

Ibat king Wikipedia

I Angela Manalang Gloria (1907 - 1995) metung yang babaing poeta o watas a Filipina king Ingles.[1][2][3]

Talambie

Balay ing Manalang Gloria king Tabaco, Albay

Mibait ya i Ángela Caridad Manalang y Legaspi aniang Agosto 2, 1907 king Guagua, Pampanga kareng kayang pengari, i Felipe Dizon Manalang (mibait king Mexico, Pampanga) ampo i Tomasa Legaspi. Nanupata, minalis ya ing karelang pamiia king labuad a Bicol, particular king Albay. Megaral ya i Caring king St. Agnes Academy king Legaspi, nung nu ya miyaring valedictorian king elementaria. Aniang banua nang senior, minalis ya king St. Scholastica's College king Malate, Manila, nung nukarin minuna yang mepansin ing kayang pamaniulat.

Kayabe ya kareng mumunang henerasion da reng babaing talapagaral king Universidad ning Filipinas i Angela Manalang. Aniang mumuna, pepalista yang magaral king leyi o law i Angela, anti ing munikala nang tata na. Nanupata, agpang king usuk ning kayang professor a megi na muring migiya kaya, i C.V. Wickers, minalis ya king malagung paniulat o literatura.

Kanita muring panaun a magaral ya king Universidad ning Filipinas megi neng karibal pang-kabang bie ing metung pang poeta, i Jose Garcia Villa. Miligligan la para king posicion ning talapatuntun a pang-literatura (literary editor) ning The Philippine Collegian deng aduang poeta, a adua nang tuki-tuking banuang telan Manalang. Aniang katlu nang banua (junior year), mekikaburi (engaged) ya kang Celedonio Gloria, a ayasawa na. Miyari yang summa cum laude aniang Marzo 1929 a maki titulung Ph.B.

Kayari na king colegio, megobra yang sinaguli i Manalang-Gloria para king Philippine Herald Mid-Week Magazine. Nanupata, meputut iti aniang mesakit yang tuberculosis. Kanitang Marzo 11, 1945, selakayan deng patrol a Japon king Alitagtag, Batangas ing kayang asawang i Celedonio ampo ing kayang anak, i Ruben. Lipat ning mete ya ing asawa na, kinabie ya i Ruben, dapot makanian kagrabi ing denasan nang pangabigla (trauma), ania e na agiung tandanan ing pamanataqui. Melakuan yang anák a balu o viuda i Manalang-Gloria, a kailangang magparagul kareng atlung ának. Uli na niti, mepilitan yang lakuan na ing pamaniulat, at lungub king negociong abaca, a matagumpe nang penibalan.

Mete ya i Angela Manalang-Gloria aniang 1995.

Agawa

Ya ing sinulat king Revolt from Hymen, metung a kawatasan a tututul king marital rape, at uli na niti, e re pepaniambutan deng purus lalaking talayatul king Commonwealth Literary Awards aniang 1940. Ya murin ing sinulat king pamitipun da reng poesia, ing Poems, a mumunang mibulalag kanitang 1940 (at mibayu aniang 1950). Atiu king pamitipun a iti ing masanting dili kareng minuna nang obra, ampo reng poesiang e pa mibulalag a misulat kanitang 1934-1938. Ing libru ing kayang linub king Commonwealth Literary Awards, nung nu ya mesambut king versung Like the Molave a sinulat nang Rafael Zulueta y da Costa.[1]

Dalerayan

  1. 1.0 1.1 The Major Collections Filipino Writers in English: Angela Manalang-Gloria, Ateneo Library of Women's Writings, date retrieved: 27 May 2007
  2. Manlapaz, Edna Zapanta. Angela Manalang Gloria : a literary biography. Quezon City : Ateneo de Manila University Press, c1993.
  3. Manlapaz, Edna Zapanta. Filipino women writers in English : their story, 1905-2002. Quezon City : Ateneo de Manila University Press, c2003.

Lon la murin

 Ing artikulung iti tungkul king tau, lugal o bageng maki kaugnayan king Kapampangan metung yang suli. Maliari kang sumaup keng Wikipedia kapamilatan ning pamandagdag o pamisusug kaniti.