Adrian Lee Magcalas

Metung kareng suging poetang kayanakan i Adrian Lee G. Magcalas a alang sawang gagambul king ikasulung ning amanu at literaturang Kapampangan.

Talambie

Misapwak niang a-5 ning Oktubri, banuang 1983 king balen Porac- ing lugal penibatan ning keyang indu bista’t man king Bataan ya menibat ing keyang ibpa. Pauli ning aske ning deuwakan a babye ning bulkang Pinatubo, milipat yang lugal tuknangan kambe ring keyang pamilya angga king miras ya Mabalacat nung nu maygit neng apulung banuang maratun.

Ing tutu na, tagalug a amanu ing sunis da reng kawatasan nang Adrian kantang magaral ya pa king sekundarya angga king pauli na naman ning pamanyuyu na king pisamban a gagamit amánung Kapampángan lalu na king Santa Misa, misane ya king pamangamit sariling sabi at lalu pa iting metingkad pauli ning pamagaral na niang koleyu ya pa king Holy Angel University na agpang keya, e biru-biru ing pamanigaral ning Center for Kapampangan Studies ning unibersidad king literatura’t amanung Kapampangan.

Sumangid na ning meyari yang bitbit ing kursung Bachelor of Science in Computer Science anyang banuang 2007, masigasig yang sinuyu king amanu ing mesambitlang poeta. Katunayan, ikwa ne ing galal at titulung Kapampangan Writer and Poet of the Year (2006) king mesabing pipagaralan. Aktibu ya naman kareng miyaliwang ligligan king pamagdeklama, crissotan at aliwa pa. Metung ya karetang regular guests for Kapampangan Poetry Airing ketang dating programang Oras ding Poeta’t Taladalit king GV AM 792 Khz.

King salukuyan, kayagum yang miyembru’t metung kareng opisyales ning KATATAGAN (Katipunan da reng Talasulat at Talaturung Kapampangan). Masipag ya namang kayabe king AGTACA (Aguman ding Talasulat Capampangan) at ANASI (Academnia ning Amanung Siswan International). Antimurin, metung ya kareng talaturu ning Holy Angel University lalam ning College of Information and Communications Technology (CICT) at king STI College Angeles bilang computer instructor.

Ding kinudtâ

BACULUD EKA MALUMPAWI

CORONASYUN 2009

EMU PAIMBURISAN

KIAK NING AGILA

MUSIKA at POESIA

TAGULELE NING PUN

TALABASA MAKIBAT KA