Apulid

Ing apúlid (Eleocharis dulcis), tanáman yang balámu dikut a katutúbû king Asia, king dákéng tropical ning Africa, ampó king Oceania. Tatanam dé karéng dakal a bangsa úli ning kayang corm a kakanan.

É ya nut o nuez ing apúlid nún é métung yang guléng tútúbú karéng latí (marshes), king lálam danum, king búrak. Atin yang bulung a lúpang túbó ampóng kúlé aluntiag ó bérdi a miraras 1.5 m (métung ampóng kapitnang métru).

Maputí la ampóng malutung déng mangálatí nang corm at malyári lang kanan a é lútû, lígâ ó ningnang, at bubúru ó gagáwang de láta. Maralas da lang kakanan king China. Maralas, kakanan dóng é lútû karin, at néng káyi mamayumuan da la. Gigilíngan da lá múrin at gagáwang arína a gagamítan da king dim sum cuisine.

Nung é la mélútû, malyáring mika sakit a fasciolopsiasis ibat king kilwal ning tanáman.

Sustáncia

Déng é lútung apúlid 74 porciento lang danum, 24 porcientong carbohydrates, métung a porcientong protina, at dítak a dítak a tabâ. Ing dinálan a gramong apúlid munyé yang dakal a vitamina B6 (beinte porciento ning RDA, itang kaylángan aldó-aldó) ampóng kasantingan a cantidad karéng áliwang vitaminang B, manganese ampóng potassium.

Suglung palual

Ing Wikimedia Commons atin yang mediang maki kaugnayan kang/king:

Eleocharis dulcis

• Porcher Michel H. et al. 1995 - 2020, Sorting Eleocharis Names. Multilingual Multiscript Plant Name Database - A Work in Progress. Institute for Land & Food Resources. The University of Melbourne (2004)
• "Step into the mud", Bangkok Post (28 May 2020).