Far Eastern University - Nicanor Reyes Medical Foundation

Ing FEU Hospital ketang kalibudtan ning decada cincuenta (1950s)

Linto ya ing Far Eastern University - Institute of Medicine o FEU-NRMF uli ning paninap nang Dr. Nicanor Reyes Sr. Kanitang Octubre 22, 1955, mibusni ya ing Ospital ning FEU antimong institucion a magkalub saup, at sasanayan no king ospital deng magaral magdoctor at maging nurse. Mitikdo ya king metung a loting maki tabas o alkus a trapezoid king dakeng pangulu-aslagan (northeastern) ning campus king Dalang Morayta (a ngeni Nicanor Reyes Sr. Avenue). Migastus lang P1.5 a miliun ba yang mitikdo ing gusaling iti, a diniseniu nang Arquitectu Felipe Mendoza kasaup ya ing Lupung ning Ospital (Hospital Committee) a pamimunan da ri Lauro Panganiban MD, Nicanor Reyes Jr., Angel Palanca, ampo i Ricardo Alfonso MD, a meging mumunang Director ning Ospital.

Metung yang maragul a grupu da reng expertu king clinica ing migumpisa king pamagsane karetang meging talapanulu. Dakal kareti ing mekilala king karelang obra. Kayabe no kareti di Fe del Mundo MD, a meging Pambansang Cientista (National Scientist), at meging pekapun ning Departamentu ning Pediatrics; i Carlos Sevilla MD a meging talapamuntuk ning Departamentu ning Oftalmologia; i Gloria Aragon MD ning Departamentu ning OB-GYN; i Liborio Gomez MD ning Departamentu ning Patologia; i Jose Tirona MD ning Departamentu ning X-Ray; i Perpetuo Gomez MD ning Departamentu ning Medicina; ampo i Jesus Nolasco MD ing Departamentu ning Fisiologia.

Ketang 1970, miyalis la king metung a fundaciun o katatagan a non-stock at non-profit (alang tubu) deng Instituto nign Medicina, Escuela ning Tecnologia Medical (School of Medical Technology), ampo ing Student Health Service Clinic (Pamanyuyung Pangkabulasan da reng Magaral).

Kareng mengalabasan a banwa, menibat la keti deng matenakan diling lagyu king pamaningat king kabulasan (healtcare) o pamanulu: apat a Kalihim ning Kabulasan (Secretary of Health), pitungpamuntuk ning Philippine Medical Association (Aguman king Pamanulu king Filipinas), anam a Pamuntuk ning Philippine College of Surgeons (Colegiu da reng Cirujano king Filipinas), ampong metung a Pamuntuk ning World Medical Association (Agumang Pangyatu king Pamanulu). Ketang 1986, binye ne ning Board of Medical Education (Lupung king Pamanuru king Pamanulu), DECS ampo ing Association of Philippine Medical Colleges (Aguman da reng Colegiu ning Medicina king Filipinas) ing matas diling uri ning pamangilala, ing panga "Center of Excellence in Medical Education" (Centru ning Kabyasnan king Pamanuru king Pamanulu).

Suglung a palwal

Far Eastern University
Institute of Accounts, Business and Finance \| Institute of Architecture and Fine Arts \| Institute of Arts and Sciences Institute of Education \| Institute of Nursing \| Institute of Law \| Institute of Graduate Studies
East Asia College \| Nicanor Reyes Educational Foundation (FERN) \| Nicanor Reyes Medical Foundation (NRMF) \| FEU Tamaraws