Isip (pun dutung)

Ing isip (Antidesma bunius) metung yang species ning pun dutung a mamunga (fruit tree) king familia Phyllanthaceae. Katutubu ya king Mauli-aslagang Asia ampong pangulung Australia. Ausan deng bignay king Tagalug ampong Chinese-laurel, Herbert River-cherry, Queensland-cherry, salamander-tree, wild cherry, ampong currant tree king Ingles. Metung yang tanaman a aliwa-liwa itsura (variable plant) a malyaring mababa ampong mala-palungpung (shrubby) o matas ampong matulid, a miraras 30 metru king kátas. Atin yang mangaragul a bulung a tabas tulungkaba (oval shaped) a evergreen (e mababaldug) at maki kabang anggang 20 cm ampong 7 cm king lapad. Makatuglung la reti kareng sanga ning pun dutung a maki mangakuyad a petiole, at gagawa lang makapal ampong masalilung a takap.

Ating lalaki ampong babaing tanaman, at tutubu la kareng mikakawaning tanaman deng lalaki ampong babaing tanaman. Masikan la ampong e makaing masanting a bau deng sampaga. Makaayus la kareng mangalating kumpul deng lalaking (staminate) a sampaga, kabang deng babai o pistillate a sampaga tutubu la kareng mangakabang raceme a potang kayi máging mangakabang sangang maki bunga. Mangabilug la reng bunga, a kulang king metung a sentimetru king lapad, a pakasabit tunggal tunggal o paris-paris kareng mangakaba ampong mangabayat a piling. Maputi la neng bubut la, at bagya-bagya lang maging malutu at kaybat, matuling.

E la agnan-agnan lululut deng bunga king metung a kumpul, anya miayaliwa la kule deng bunga king metung a kumpul. Malutu ya katas ing balat ning bunga, kabang ala yang kule ing maputing laman. Maputi ya kule ing butul. Maslam ya ing bungang anting cranberry neng bubut ya, at maslam-aslam yang mayumu-yumu potang malulut ya. Tatanam de ing pun dutung king kabilugan ning lugal nung nu ya katutubu, at maralas dong gagawan jam deng prutas. Maralas deng tatanam kareng mula king Java.

Suglung palwal

• Purdue New Crops Profile
• Antidesma Species Accounts