Municang Basan

Municang Basán

Ng: Carolina Sicat Guanzon

Aláng capiadian miwale ca cacu

dapot caladua cu queca peñgacu cu.

Lugúd cu bubucal e buláng matatdas

aláng capupusan qng salû cu wagas

Pigtumaila raca qng cacung canduñgan

cabang tuag-tuag cata quetang patuastuasan.

Obat miwale ca qng cacung sipiñgan?

Dimniu’ng meñgagas ica panacauan.

Qng aslág ning aldo lupa mu quiquinang.

Qng sala ning bulan lupa mu pilácan.

Qng cacung paninap ica’ng panenayan

lalam ning tanaman nung nuca mesamsam.

Anac-anac cu pa ica na’ng liguran.

Ñgening ala naca e raca queliñguan.

Bista man caul cu melimás ya lamán

e ca míalilan munica cung basán.