Saresa
- Para keng aliwang gamit, lawen ye ing Saresa (disambiguation).
| Saresa | ||||||||||||||
|---|---|---|---|---|---|---|---|---|---|---|---|---|---|---|
 | ||||||||||||||
| Scientific classification | ||||||||||||||
| ||||||||||||||
| Binomial name | ||||||||||||||
| Muntingia calabura L. |
Ing saresa (Muntingia calabura L.), ing bukud mung species a kayabe king genus a Muntingia, metung yang tanaman a manyampaga ng katutubu king mauling Mexico, Caribbean, Kalibudtang America, ampong albugang Mauling America paras mauli king Peru ampong Bolivia. Kayabe la kareng karaniwang aus o common name para kaniti deng Ingles a Jamaican cherry, Panama berry, Singapore cherry, Bajelly tree, Strawberry tree; deng Castilang bolaina, yamanaza, cacaniqua, capulín blanco, nigua, niguito, memizo or memiso; ing Indonesian a kersen; ing Vietnamese a Trứng cá (thực vật); ampo king Filipinas, aratilis, aratiles, manzanitas ampong sarisa,
Iti malati yang pun dutung a 7–12 metru katas at maki pakadaneng (tiered) sangang makabalag bagya. Atin yang maki "ipan" o mala-lagaring bulung a 2.5–15 cm kaba ampong 1–6.5 cm lapad. Malati ya sampaga, a maputi ampong mabuluk bagya. Mamunga yang 1–1.5 cm a maputlang malutung bunga. Mayumu ya ampong masabo ing kayang bunga, a maki dakal a mangalating butul.
Metung yang tanaman a mumunang tutubu king metung a lugal (pioneer species), tutubung masalese king e masanting a gabun, kakabye kareng lugal a asidu o alkaline/basic, at agyu na ing lalangi. Kakalat dong ayup ampong talibatab deng kayang bini. Tatanam de para kareng kayang bunga, at míkalat ne kareng aliwang dake ning tropiku o malisangan a lugal, kayabe ya ing mauli aslagang Asia. Antimong metung a tanaman a manimuna king pamanubu o pioneer, sasaup ya bang ibili ing gabun king kundisyun ba lang malyaring tumubu deng aliwang tanaman. Nanupata, malyari ya mu namang ituring a species a mapanyakup (invasive species) uling malyari nong sawlan deng tanaman a katutubu.