Edward Lhuyd

Ibat king Wikipedia
Jump to navigation Jump to search

I Edward Lhuyd ([ˈɬuɪd]} Hloo-id; a neng kai misusulat a Llwyd ngening panaun tamu) (1660 – Junio 30, 1709) metung yang Welsh a naturalista, botanist, matenakan king amanu, geographer ampong antiquary.

Mibait ya king Loppington, Shropshire, at anak ne king kilual Edward Lloyd ning Llanforda, Oswestry kang Bridget Pryse ning Llan-ffraid, malapit king Talybont, Ceredigion. Megaral ya at tinuru king Oswestry Grammar School. Metung ya kareng suging familia ning mauli--albugang Gales o Wales; lipat ning matua ne karin ing familia na, e ya mabandi, at sinubuk yang linub king agricultura ampong industria i tata na, ania abalu ne ing bayung ciencia ning panaun a ita. Megaral yang grammar school king Oswestry, at sindu na iti king Jesus College, Oxford, dapot tinuknang ya bayu ya miyari. Aniang 1684, mituldu yang pakaladua (assistant) nang Robert Plot, ing Keeper ning Ashmolean Museum, at elilan ne king puestung iti aniang 1690; menatili ya keti anggang 1709.

Kabang magobra ya king Ashmolean, dakal ing gewa nang biahi. Uli ning pamamunta na king Snowdonia aniang 1688, abalangkas ne para kang John Ray ing Synopsis Methodica Stirpium Britannicorum, metung a listaan da reng tanaman a tubu king labuad o rehion a ita. Kaibat ning 1697, minta ya i Lhuyd king balang county o condado king Wales, at kaibat miglakbe ya king Escocia, Irlandia, Cornwall, ampong Brittany, at saka king Isle of Man. Aniang 1699, kapamilatan ning ambag ibat king kaluguran nang i Isaac Newton, linimbag ne ing 'Lithophylacii Britannici Ichnographia, metung a catalogo da reng fossil a metipun kareng lugal padurut king Inglaterra, keraklan king Oxford, at mayayakit na ngeni king Ashmolean.

Aniang tauli nang dake ning ka-17 a dilanua o siglu, lepitan de i Lhuyd ning metung a grupu da reng talapanigaral (scholars), a panimunan nang John Keigwin ning Mousehole, a gugusal para king pamanatili na ampong paniulung ning amanung Cornish, at tinggap ne ing pamanagkat bang munta king Cornwall bang manigaral king amanu. Megi neng paksa ning pamanigaral nang Lhuyd ing Early Modern Cornish, at melimbag ya ing kayang obra aniang 1702. Aliwa ya iti king amanu aniang Edad Media (medieval) uling mas simpli ing kayang gramatica ampong pangabalangkas.

Pigkalubanan neng MA honoris causa ning University of Oxford i Lhuyd aniang 1701, at meyalal yang Fellow of the Royal Society kanitang 1708. Mete ya uling king pleurisy king Oxford i Lhuyd aniang 1709.

Pekilagiu re kaya ing Snowdon lily o Lloydia serotina, ampo ing Cymdeithas Edward Llwyd, ing National Naturalists' Society of Wales.

Ibat ya kaya ing mumunang pamaglarawan a cientifico ampong pamamie lagiu ning ngeni balu tamung dinosaur: ing ipan ning sauropod a Rutellum implicatum (Delair and Sarjeant, 2002).

Karagdagang pamamasa

  • Delair, Justin B. and William A.S. Sarjeant. "The earliest discoveries of dinosaurs: the records re-examined." Proceedings of the Geologists' Association 113 (2002): 185-197.
  • Emery, Frank. Edward Lhuyd. 1971.
  • Evans, Dewi W. and Brynley F. Roberts (eds.). Archæologia Britannica: Texts and Translations. Celtic Studies Publications 10. 2007. Description.
  • Gunther, R.T. The Life and Letters of Edward Lhuyd. 1945.
  • Roberts, Brynley F. Edward Lhuyd, the Making of a Scientist. 1980.
  • Williams, Derek R. Prying into every hole and corner: Edward Lhuyd in Cornwall in 1700. 1993.
  • Williams, Derek R. Edward Lhuyd, 1660-1709: A Shropshire Welshman. 2009.
  • "Never at rest" A biography of Isaac Newton by Richard S. Westfall ISBN : 0-521-27435-4 pp581,

Suglung palual

Template:Cornish language